ដោយ : បន្ទាយ 

បន្ទាយមានជ័យ : សម្តេចហ៊ុន ម៉ាណែត នាយករដ្ឋមន្ត្រីនៃកម្ពុជាបានផ្តល់ថវិកាចំនួន១ម៉ឺនដុល្លារអាមេរិក ចូលបុណ្យក្រុមគ្រួសារនៃសពពលករខ្មែរទទួលមរណភាពដោយការរញ្ជួយដីនៅថៃ គឺបន្ទាប់ពីសម្តេចបានផ្ញើសារលិខិតរំលែកមរណទុក្ខផ្ញើជូនលោក សែ វិត និងលោកស្រី ភិន រី ព្រមទាំងក្រុមគ្រួសារ ចំពោះមរណភាពរបស់លោក មាស សាវ៉ាង ត្រូវជាកូនរបស់លោក និងលោកស្រី ដែលបានទទួលមរណភាពក្នុងអាយុ ២៣ឆ្នាំ នៅក្នុងគ្រោះរញ្ជួយដី នៅប្រទេសថៃ កាលពីថ្ងៃទី២៨ ខែមីនា ឆ្នាំ២០២៥ ខណៈកំពុងស្នាក់នៅ និងធ្វើការនៅ?ប្រទេសថៃ។

នាថ្ងៃទី០១ខែមេសា ឆ្នាំ២០២៥ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ តំណាង ដ៏ខ្ពង់ខ្ពស់ សម្តេចមហាបវរធិបតីនាយករដ្ឋមន្ត្រី និងលោកជំទាវបណ្ឌិត រួមជាមួយរដ្ឋបាលខេត្តបន្ទាយមានជ័យ បាននាំសាររំលែកទុក្ខរបស់រាជរដ្ឋាភិបាល ជូនចំពោះលោក សែ វិត និងលោកស្រី ភិន រី ជាឪពុកម្តាយនៃសពលោក មាស សាវ៉ាង ព្រមទាំងក្រុមគ្រួសារ ស្ថិតនៅក្នុងភូមិបល័ង្គ ឃុំតាគង់ ស្រុកម៉ាឡៃ ខេត្តបន្ទាយមានជ័យ។

នាឱកាសនោះ លោករដ្ឋមន្ត្រី ក៏បាននាំយកបច្ច័យរបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ចំនួន ១ម៉ឺនដុល្លារជូនក្រុមគ្រួសារនៃសព រួមទាំងថវិកា របស់ ក្រសួងការងារ និងបណ្តុះបណ្តាលវិជ្ជាជីវៈ ចំនួន ២០លានរៀល, ថវិការបស់ លោកអភិបាលខេត្តចំនួន ២លានរៀល, ថវិការបស់ក្រុមការងាររៀបចំ អង្គការ ចាត់តាំងយុវជនគណបក្សប្រជាជនកម្ពុជានៅទ្វីបអាស៊ីខាងកើត និងអាគ្នេយ៍ (ESEA) ចំនួន ១៥លានរៀល ព្រមទាំងថវិកា របស់សមាគម ភ្នាក់ងារជ្រើសរើសពលករកម្ពុជា (ACRA) ១៥លានរៀលផងដែរ៕

គួរកត់សម្គាល់ថា ជាបន្តបន្ទាប់ ថ្នាក់ដឹកនាំបានផ្ញើសារជាបន្តបន្ទាប់ទៅរំលែកទុក្ខគ្រួសារនៃសពពលករខ្មែរនេះផងដែរ៕